མཚན་མོ་ཟླ་བར་ཁེན་ནས། །

དྲན་པའི་གཞས་ཤིག་བཏང་ཡོད། །

ཟླ་བ་ལྷ་མོའི་སེམས་པ། །

དྲན་པའི་གསང་བ་བརྟོལ་སོང་། །

སྐར་ཚོགས་གདན་དུ་བཏིང་ནས། །

སྐྱོ་བའི་སྒྲུང་ཞིག་འཆད་དུས། །

བྱང་ཕྱོགས་སྐར་མ་ཨ་བརྟན། །

སྨྲེང་བའི་དངན་པ་ཤོར་སོང་། །

ཚེ་འདིར་འཁྲེང་བའི་མི་ལ། །

བློ་སེམས་དཀར་པོ་གནང་ཆོག །

གཏན་གྱི་རེ་བ་བྲལ་ཡང་། །

ལན་གཅིག་འཕྲད་པར་སྒུག་ཆོག །

སེམས་ཀྱི་གཙང་པོའི་ཁ་ནས། །

དྲན་པའི་གླིང་བུ་འབུད་དུས། །

གླིང་བུའི་འགྱུར་ཁུགས་རེ་རེ། །

གཙང་པོའི་རླབས་ལ་འདྲེས་སོང་། །

བྱང་སྤྲིན་ལྷོ་ལ་ཞོགས་དུས། །

སྙིང་གཏམ་ཚིག་གསུམ་སྤྲིངས་ཡོང་། །

ལྷོ་ཕྱོགས་རྒྱ་མཚོའི་ཁ་ནས། །

ཆར་བའི་ཟོལ་གྱིས་ཕོངས་ཤིག །

ལས་འཕྲོ་གཙང་པོའི་རྒྱུན་ལ། །

ལྟོ་དཀར་ཉ་མོ་འཁོར་དང་། །

སྨད་ཀྱི་རྒྱ་མཚོའི་ཁ་ནས། །

འཁྱུག་རྩལ་ཅི་དགར་རོལ་ཆོག །

སེམས་ཀྱི་གཡུ་གཞོང་ཐང་ལ། །

སྤང་རྒྱན་མེ་ཏོག་བཞད་ཡོད། །

གཡུ་སྦྲང་འཁོར་རྒྱུ་བྱུང་ན། །

མེ་ཏོག་ཞལ་ཁ་འཛུམ་ཡོང་། །

མེ་ཏོག་རི་ནས་བཞད་དེ། །

འདབ་ལོ་གཞོང་ལ་འཁུར་འགྲོ །

གཞོང་གི་མཚོ་མོ་ཁ་ནས། །

ཁ་བའི་ཚུལ་གྱིས་བབས་ཆོག

ཁ་བ་མཚོ་ལ་འཐིམ་འཐིམ། །

འུ་གཉིས་འདྲེས་རྒྱུ་བྱུང་ན། །

མཚོ་རྡེའུ་དཀར་པོའི་སྟེང་ལ། །

དམ་ཚིག་རི་མོ་བརྐོས་ཆོག །