ཀྲུང་གོའི་ཁྲིམས་ལུགས་སློབ་ཚོགས་ཀྱི་རྒྱལ་ཡོངས་ཚོགས་མིའི་འཐུས་མི་ཚོགས་ཆེན་ཐེངས་དགུ་པ་འཚོགས་ལ་ཉེ་བའི་སྐབས་དང་བསྟུན་ནས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཚོགས་ཆེན་ལ་འཕྲིན་ཡིག་བསྐུར་ཏེ། རྒྱལ་ཡོངས་ཀྱི་རྒྱ་ཆེའི་ཁྲིམས་ལུགས་རིག་པ་དང་བཅའ་ཁྲིམས་ལས་དོན་པར་འཚམས་འདྲི་གནང་བར་མ་ཟད། ཁྲིམས་ལུགས་སློབ་ཚོགས་ཀྱི་ལས་དོན་ལེགས་པར་སྒྲུབ་པའི་ཐད་རེ་བ་བཏོན།
ཞི་ཅིན་ཕིང་གིས་འཕྲིན་ཡིག་ནང་ཏང་གི་ཚོགས་ཆེན་ཐེངས་བཅོ་བརྒྱད་པའི་ཚུན་དུ། རིམ་པོ་སོ་སོའི་ཁྲིམས་ལུགས་སློབ་ཚོགས་ཀྱིས་རྒྱ་ཆེའི་ཁྲིམས་ལུགས་རིག་པ་དང་བཅའ་ཁྲིམས་ལས་དོན་པར་མཐུན་སྒྲིལ་དང་སྣེ་ཁྲིད་བྱས་ཏེ་ལས་དོན་གང་མང་བསྒྲུབས་ནས། ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བར་སྐུལ་འདེད་གཏོང་ཆེད་བྱས་རྗེས་ཆེན་པོ་བཞག་ཡོད་ཅེས་གསུངས།
ཞི་ཅིན་ཕིང་གིས་དུས་རབས་གསར་པ་དང་སྐྱོད་ལམ་གསར་པའི་སྟེང་དུ། རིམ་པ་སོ་སོའི་ཁྲིམས་ལུགས་སློབ་ཚོགས་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་བྱས་ནས། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་དགོངས་པ་ཕྱོགས་ཡོངས་ནས་ལག་བསྟར་བྱེད་པ་དང་། ཏང་གི་ཁྱོན་ཡོངས་ཀྱི་མགོ་ཁྲིད་རྒྱུན་འཁྱོངས་བྱེད་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་བགྲོད་ལམ་སྟེང་བསྐྱོད་རྒྱུ་རྒྱུན་འཁྱོངས་བྱེད་པ། ཏང་དང་རྒྱལ་ཁབ་ཀྱི་ལས་དོན་ཁྱོན་ཡོངས་ལ་ཞབས་འདེགས་ཞུ་རྒྱུ་རྒྱུན་འཁྱོངས་བྱེད་པ། རང་ངོས་འཛུགས་སྐྲུན་ལ་སྔར་ལས་ཤུགས་སྣོན་པ། འབྲེལ་ཟམ་འབྲེལ་ཐག་གི་ནུས་པ་སྔར་ལས་ལེགས་པའི་སྒོ་ནས་འདོན་སྤེལ་བྱས་ཏེ། ཁྲིམས་ལུགས་རིག་པའི་ཞིབ་འཇུག་དར་རྒྱས་གཏོང་བ་དང་ཁྲིམས་སྐྱོང་ལག་ལེན་ལ་ཞབས་འདེགས་ཞུ་བ། ཁྲིམས་སྐྱོང་དྲིལ་སྒྲོག་ལ་ཤུགས་སྣོན་པ། ཁྲིམས་སྐྱོང་འཇོན་མི་གསོ་སྐྱོང་བྱེད་པ་སོགས་ཀྱི་ལས་དོན་ནན་ཏན་ངང་སྒྲུབ་ནས། ཁྲིམས་ལུགས་སློབ་ཚོགས་ཀྱི་བྱ་གཞག་འཕེལ་རྒྱས་ཀྱི་རྣམ་པ་གསར་པ་འབད་པས་བསྐྲུན་དགོས། རྒྱ་ཆེའི་ཁྲིམས་ལུགས་རིག་པ་དང་བཅའ་ཁྲིམས་ལས་དོན་པས་ཁྲིམས་སྐྱོང་ལ་ཡིད་ཆེས་བརྟན་པོ་བྱེད་རྒྱུ་དང་། ཁག་ཁུར་གྱི་འདུ་ཤེས་ཇེ་དྲག་ཏུ་གཏོང་བ། ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་རླབས་ཆེན་གྱི་ལག་ལེན་ཁྲོད་འབད་པས་ཞུགས་ནས། ཆུ་ཚད་སྔར་ལས་མཐོ་བའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་འཛུགས་སྐྲུན་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་བྱས་རྗེས་གསར་པ་འཇོག་དགོས། རིམ་པ་སོ་སོའི་ཏང་ཨུ་ཡིས་ཁྲིམས་ལུགས་སློབ་ཚོགས་ལ་མགོ་ཁྲིད་བྱ་རྒྱུར་ཤུགས་བསྣན་ནས། ཁྲིམས་ལུགས་སློབ་ཚོགས་ཀྱིས་ཁྲིམས་ལྟར་སྒྲིག་ཡིག་གཞིར་བཟུང་ནས་ལས་དོན་སྤེལ་རྒྱུར་རྒྱབ་སྐྱོར་ནུས་ལྡན་བྱ་དགོས་ཞེས་ནན་གྱིས་བསྟན།