དེང་སྐབས་སྐད་འཕྲིན་ནི་སྤྱི་ཚོགས་འབྲེལ་འདྲིས་ཀྱི་འཕྲིན་གཏོང་ཡོ་བྱད་གཙོ་བོ་ཞིག་ཏུ་གྱུར་ཡོད་ལ། ཚང་མས་སྐད་འཕྲིན་ལ་བརྟེན་ནས་ཆ་འཕྲིན་མཉམ་སྤྱོད་དང་འབྲེལ་གཏུག་འཕྲིན་གཏོང་བྱེད་པར་གོམས་ཡོད་ཅིང་། ཧ་ལམ་མི་གང་མང་ཞིག་སྐད་འཕྲིན་ཚོགས་པ་མང་པོ་རུ་ཞུགས་ཡོད་ངེས་རེད། དུས་རྒྱུན་ཁ་བརྡ་བྱེད་པའི་ཁྲོད་དུ་ཕན་ཚུན་རྩོད་གླེང་བྱེད་པའི་གནས་ཚུལ་ལ་འཕྲད་སྲིད། ཡིན་ནའང་སྐད་འཕྲིན་ཚོགས་པའི་ཁ་བརྡའི་ཁྲོད་དུ་མི་གཞན་ལ་དམའ་འབེབས་བྱས་ན་ཁྲིམས་འགལ་ཡིན་སྲིད།
ཉེ་ཆར། དཔའ་ལུང་རྫོང་སྤྱི་བདེ་ཅུའུ་ཀ་མདོ་འགོག་སྲུང་ཁུལ་གྱི་གྱོད་སྒྲུབ་རུ་འབྲིང་གིས་སྐད་འཕྲིན་ཚོགས་པ་ག་གེ་མོའི་ནང་མི་གཞན་ལ་དམའ་འབེབས་བྱས་པའི་གྱོད་གཞི་ཞིག་ཞིབ་བཤེར་ཐག་གཅོད་བྱས།
ཟླ7པའི་ཚེས9ཉིན། མངའ་ཁུལ་གྱི་མང་ཚོགས་མཱ་ཀ་པས་ཉེན་རྟོག་པར་ཡར་ཞུ་བྱས་ཏེ། མི་ཞིག་གིས་སྡེ་བའི་སྐད་འཕྲིན་ཚོགས་པའི་ནང་དུ་སྐད་བསྐུར་ནས་རང་ཉིད་ལ་དམའ་འབེབས་བྱས་སོང་ཟེར། སྙན་སེང་འབྱོར་རྗེས། མི་དམངས་ཉེན་རྟོག་པས་འཕྲལ་དུ་ལས་དོན་སྤེལ་ནས་ཞིབ་བཤེར་བྱས་པ་བརྒྱུད། ཁྱིམ་མཚེས་བར་གྱི་རྩོད་གླེང་གི་དབང་གིས་སྡེ་བ་གཅིག་པའི་མཱ་ཁ་པས་སྡེ་བའི་སྐད་འཕྲིན་ཚོགས་པའི་ནང་དུ་ཁྱིམ་མཚེས་མཱ་ཀ་པ་དང་ཁོའི་ཁྱིམ་མི་ལ་མངོན་སུམ་འཛེམ་མེད་ཀྱིས་དམའ་འབེབས་བྱས། དེའི་རྗེས་གནོད་འཚེ་ཕོག་མཁན་གྱི་ནུ་བོ་མཱ་ཆེ་གེ་མོས་ཁོང་ཁྲོས་མ་བཟོད་པར་ཚོགས་པའི་ནང་དུ་སྡིགས་དམོད་བྱས་ཤིང་། ཕྱོགས་གཉིས་པོས་སྐད་འཕྲིན་ཚོགས་པ་རུ་ཕན་ཚུན་ལ་དམའ་འབེབས་བྱས་ནས་ཤུགས་རྐྱེན་ངན་པ་བཟོས།
འདྲི་རྩད་བྱས་པ་བརྒྱུད། མཱ་ཀ་པ་དང་ཁ་པ་གཉིས་ཀྱིས་སོ་སོར་དམའ་འབེབས་བྱས་པའི་ཁྲིམས་འགལ་དོན་དངོས་ཇི་མ་ཇི་བཞིན་ཁས་བླངས། དཔའ་ལུང་རྫོང་སྤྱི་བདེ་ཅུའུ་ཡིས་ཁྲིམས་ལྟར་མཱ་ཀ་པ་དང་ཁ་པ་གཉིས་སྲིད་འཛིན་བཀག་ཉར་བྱས།