(དཔལ་ཡུལ) ཁམས་ཟླ་སྲས།

སྣང་བའི་གོམས་འགྲོས་དབྱངས་ལ་སྦྱར་བཞིན། །

འདུན་མའི་ཆེད་དུ་རི་ཀླུང་བརྒལ་ཏེ། །

སེམས་སོང་དབྱངས་ཀྱི་ཟླ་བ་ལྷ་མོ། །

བྱམས་བརྩེའི་འོད་དཀར་བདག་ལ་སིམས་རོགས། །

དྲུག་འགྱུར་ངག་ལ་རང་དབང་ཐོབ་ཟེར། །

འཕྱོར་སྒེག་འཛུམ་ལ་འགྲན་ཟླ་མེད་ཟེར། །

ཁྱོད་ཀྱི་བརྩེ་བའི་དབྱངས་རྟ་རུམ་ནས། །

ཤོམ་ཆེན་ཞིག་གིས་འགྲོ་སྟངས་ལྷག་ཡོད། །

གཟུགས་ཡག་སྨྲ་བྱའི་སྒྲོ་གུར་ཕིབ་ནས། །

ཉམས་འགྱུར་ངག་གི་འགྱུར་ཁུག་རྫོགས་པའི། །

ཡིད་འོང་གཞོན་ནུའི་རོལ་སྒེག་འགྱིང་མ། །

དབྱངས་ཅན་ལྷ་མོ་ད་ཚུར་བྱོན་དང་། །

སྙིང་གི་བུམ་པའི་མགོ་བོ་བཀྱག་ནས། །

འཛུམ་གྱི་འཛུམ་དམུལ་ཕྱི་རུ་མངོན་དུས། །

སྙན་ཤལ་འདབ་མ་དྲག་ཏུ་སྦྱར་ནས། །

ཁྱོད་ལ་དགའ་བའི་འོ་ཞིག་བསྐུར་འདོད། །

སོ་དཀར་ཕྲེང་བའི་ཀུ་མུད་འཛུམ་འཛུམ། །

དགྱེས་འཛུམ་པདྨོའི་མེ་ཏོག་བཞད་བཞད། །

ཟླ་བའི་འོད་ཟེར་དབྱིངས་ལ་བཏེགས་ཏེ། །

བྱིན་རླབས་བརྩེ་བའི་སྙན་ཆར་ཕོབས་དང་། །

དབྱངས་གསལ་སུམ་ཅུའི་ཚིག་གི་ཕྲེང་བ། །

སྙན་དབྱངས་ངག་གི་འདབ་མར་རློམ་ཏེ། །

རྒྱང་རིང་ལྷ་ཡི་འོད་ཟེར་ཅན་མ། །

དོ་ནུབ་མལ་ས་སྟོང་བས་བསྒུག་ཡོད། །